Ташкилий тузилмаси
ЎЗБЕКИСТОН КОМПОЗИТОРЛАРИ ВА БАСТАКОРЛАРИ УЮШМАСИ

 

АНОНС

Дш Сш Чш Пш Ж Ш Як
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30

                             АБДУЛАЗИЗ ҲОШИМОВ

(1939-2003)

Санъатшунослик фанлари доктори, мусиқашунос ва композитор Абдулазиз Ҳошимов Ўзбекистон Бастакорлар уюшмасига 1981 йили қабул қилинган. Мусиқашунос сифатида уйғур муқомлари ҳақидаги илмий тадқиқий мақолалари, композитор сифатида яратган асарлари билан замонавий мусиқашунослик фани ва композиторлик ижодиётини бойитди.

Абдулазиз Сатторович Ҳошимов Хитой Халқ Республикаси Шинжон уйғур автоном районининг Ғўлжа шаҳрида 1939 йилнинг 14 мартида таваллуд топди. 1946-1956 йиллари Ғўлжа шаҳрининг умумтаълим мактабида ўқиди. Болалигидан мусиқага бўлган қизиқиши ва мазкур мактабдаги машҳур созандалардан мумтоз мусиқа сирларини ўрганди. Уйғур халқ мусиқа меросини ўз қалбида сингдира борди ва уйғур муқомларини ўргана бошлади. 1956-1959 йиллари Абдулазиз Урумчи шаҳридаги тиббиёт институтида ўқийди. Лекин мусиқага бўлган иштиёқи туфайли 1959 йили Ғўлжа шаҳридаги маданият уйи ансамблида ишлай бошлайди. 1960 йили Абдулазиз Ҳошимов Тошкент шаҳрига оиласи билан бутунлай кўчиб келади. 1961-1965 йиллари Йўлдош Охунбобоев номидаги Тошкент шаҳар Маданият уйидаги уйғур ашула ва рақс ансамблида созанда бўлиб ишлайди. 1965-1969 йилларда Ҳамза номидаги Тошкент мусиқа билим юртининг мусиқа назарияси бўлимида ўқийди. Сўнгра Тошкент давлат консерваториясининг композиторлик факультети тайёрлов бўлимига ўқишга қабул қилинади. 1971 йили консерваториянинг асосий босқичига ўтказилиб, профессор Г.А.Мушель синфида композиторлик мутахассислигидан сабоқ ола бошлади. 1972 йилдан Шарқ мусиқаси кафедрасида профессор И.Р.Ражабов раҳбарлигида мақом асосларидан сабоқ олади. 1976 йили мусиқашунослик, 1977 йили эса композиторлик мутахассисликлари бўйича консерваторияни муваффақиятли тугатади.

Мусиқашунос-композитор А.Ҳошимов талабалик даврида 1967-1972 йиллари ўзбек радиоси қошида тузилган уйғур мусиқаси ансамблида чангчи, 1974-1976 йилларда Тошкент шаҳар 23-болалар мусиқа мактабида ўқитувчи бўлиб ишлади. Консерваторияни тамомлагач, умрининг охиригача Санъатшунослик илмий тадқиқот институтида илмий ходим бўлиб ишлади. 1994-2003 йилларда консерваториянинг мусиқий шарқшунослик кафедрасида ўқитувчи, сўнгги йили эса профессор вазифасида фаолият олиб борди. Ўн иккита уйғур муқомлари устида илмий ишлар ёзди, уларни ноталаштирди, 1988 йили уйғур муқомлари мавзуида номзодлик ва 2001 йили уйғур касбий мусиқа мероси бўйича докторлик диссертацияларини ёқлади.

 

Мусиқашунос А.Ҳошимов йиллар давомида ўзининг илмий мақолалари ва изланишлари билан халқаро анжуманларда фаол қатнашди. «О структуре уйгурских мукамов в условиях их бытования» («Макомы, мугамы и современное композиторское творчество» Ташкент, 1978), «Уйғур ўн икки муқоми» («Парвоз» Олмаота, 1979 й.), «Уйғур муқомлари» («Сов Ўзбекистони санъати» журнали, 1978, №6), «О некоторых проблемах изучения двенадцати уйгурских мукамов» (Актуальные проблемы уйгуроведения, Алма-Ата, 1983), «Локальные разновидности двенадцати уйгурских мукамов» («Музыка народов Азии и Африки» М. 1984), «Уйгурский санам» («Традиции музыкальных культур народов Ближнего, Среднего Востока и современность» М. 1987), «Двенадцать уйгурских мукамов в условиях современности» Борбад и художественные традиции народов Передней и Центральной Азии, Душанбе, 1990), «Двенадцать мукамов и их локальные особенности (на примере илийских строений, илийских мукамов)» (Маком, Берлин, 1992), «Уйғур ўн икки муқоми системаси ҳақида» (Уйғур он икки муқоми тадқиқоти, Пекин, 1992), «Уйғур халқининг ўн икки ноғора муқомлари» (Ражабийхонлик, Тошкент, 1993), «Уйғур ўн икки муқоми тадқиқотидаги бир қанча масалалар» (Уйғур Осиё тадқиқоти, Урумчи, 1989, №1) «Муқом» (Таджикская энциклопедия, 7 том. Т.,1978), «Доланские мукамы» (тезисы III Международного музыкального симпозиума, Самарканд, 1988), «Ноғора муқомлари» (тезис Истамбул, 1989), қўлёзма: «Двенадцать уйгурских мукамов» (нотные и поэтические тексты) 1 -2 том; «Нохшо жанри ва унинг алоҳидаликлари» (1989) каби илмий мақолаларни ёзди.

А.Ҳошимов композитор сифатида турли жанр ва шаклларда асарлар басталади. Торли оркестр учун «Адажио» (1970 й.), фортепиано учун «Тўртта пьеса», «Вариациялар» (1971 й.), виолончель, гобой, қўшнай ва фортепиано учун пьесалар (1973 й.), торли квартет учун «Икки пьеса», торли квартет, флейта ва фортепиано учун «Сонатина» (1974 й.), торли оркестр учун «Пассакалия» (1975й.), «Симфоник поэма» (1977й.), катта симфоник оркестр, аралаш хор, хонанда ва сухандон учун «Халқ қаҳрамони Содир полвон хотирасига» кантатаси (1977 й.), жўрсиз хор учун «Элим бор» (И.Искандар сўзи) асарлари, «Гулдаста» (Т.Наматов сўзи), «Булоқ қўшиғи» (Х.Ҳамроев сўзи) романслари, «Ғунчам» мусиқали драмаси (З.Қодирий асари) ва бошқалар шулар жумласидан.

Уйғур ва ўзбек халқлари маданияти намояндаси, олим ва ижодкор Абдулазиз Ҳошимов ўзининг кўпқиррали ижодий фаолияти билан кўп миллатли республикамиз мусиқа санъати ва мусиқашунослик фанининг ривожланишига катта ҳисса қўшди.

                                  ТЎХТАСИН ҒАФУРБЕКОВ

(1939)

Ўзбекистонда хизмат кўрсатган санъат арбоби, Ўзбекистон давлат консерваторияси профессори, санъатшунослик фанлари доктори, мусиқашунос Тўхтасин Ботирович Ғафурбеков забардаст олимлардан биридир. У ўзининг илмий тадқиқотчилик, ўқитувчилик ва жамоатчилик фаолияти билан нафақат мусиқашунослик фанига, балки замонавий ўзбек мусиқа санъатининг тарғиботига ҳам катта ҳисса қўшиб келмоқда.

Унинг ўзбек ва бошқа тилларда нашр этилган мақола ва монографиялари, Шарқ-Ғарб мавзуларидаги тадқиқотлари, илмий-маърифий ва ўқув нашрлари, қатор радио ва телевидение дастурлари, Ўзбекистон ва хорижий мамлакатларда ўқиган маърузалари эътиборга сазовордир.

Тўхтасин Ғофурбеков Фарғона шаҳрининг Янгисой маҳалласида 1939 йили 7 май куни таваллуд топди. Болалигидан ота-онасидан айрилган Тўхтасин 1946 йилдан болалар уйида тарбияланади. У ерда аккордеон, фортепиано, трубада чалишни ўрганади ва Уста Олим Комилов номли 1-болалар мусиқа мактабида дамли чолғулар, мусиқа назарияси ва фортепиано фанлари сирларини қунт билан ўзлаштира бошлайди.

1957 йили Тошкентга келиб Ҳамза номидаги мусиқа билим юртининг мусиқа назарияси бўлимига ўқишга киради. Унинг мусиқашунос сифатида вояга етишида устози Е.А.Финченконинг хизматлари ниҳоятда катта.

1961 йили билим юртини битиргач, Тошкент давлат консерваториясининг мусиқашунослик факультетига ўқишга кириб Н.Ф.Орлов, Ю.Г.Кон, фортепианодан К.М.Успенская синфларида таҳсил олди. 1962-1965 йилларда ҳарбий хизматда дамли оркестр ва ҳаваскорлик тўгаракларига раҳбарлик қилди. Армия сафидан қайтиб, консерваторияда ўқишни давом эттиради. 1969 йили «Фольклор ва композиторлик ижодиёти (Ғарбий Европа, рус ва Ўзбекистон муаллифлари мисолида)» мавзуидаги диплом ишини якунлайди. Шу даврдан консерваторияда ўқитувчи, Санъатшунослик институтида кичик илмий ходим сифатида фаолият кўрсатди.

1967 йилдан эътиборан Фарғона водийси, Тожикистон, Қирғизистоннинг айрим ҳудудларида давом топган мусиқа меросини тўплаш ва кейинчалик ноталаштириш ҳам Т.Ғафурбеков фаолиятига айланди.

1970 йили Ўзбекистон Бастакорлар уюшмасига қабул қилинди, 1971 йили кенгаш ҳайъатига сайланди, 1979-1982 йиллари уюшманинг фольклор шўъбасига, 1982-1985 йиллари мусиқа танқидчилиги ва мусиқашунослик шўъбасига раҳбарлик қилди.

Т.Ғафурбеков 1970-йилларда консерваторияга асосий ишга ўтади, “Ўзбек мусиқаси тарихи” ва «XX аср Ғарб мусиқаси» курсларини қайтадан тузади. «Мусиқанинг элементар назарияси» (1980й.), И.Способиннинг «Мусиқа шакли» (1982й.), В.Левикнинг «Чет эл мусиқаси тарихи» (1984й.) адабиётларини ўзбек тилига таржима қилади, муаллифлар гуруҳи яратган «Ўзбек мусиқаси тарихи» (1981й.), О.Н.Азимованинг «Гармония» (2000й.), И.Акбаровнинг «Мусиқа луғати» (1987й. янги нашри - 1997й.) сингари қатор дарсликларнинг ўзбек тилидаги нашрларига махсус муҳаррирлик қилди.

1960-йиллардан эътиборан нашр этила бошланган илк тадқиқотлариданоқ, ёш олим ўзбек мусиқаси тарихи, замонавий композиторлик ижодиёти муаммолари билан чегараланмай, Ғарб ва қардош халқлар мусиқасига фаол мурожаат эта бошлайди. «Боқий образлар саҳнада», «Янги симфониялар», «Новосибирскда илмий анжуман» каби мақолалар шулар жумласидандир. Т.Ғафурбековнинг қатор мақола ва тадқиқотлари маҳаллий рўзнома, журналлар ва тўпламлардан ташқари Москва, София, Бухарест, Олмаота, Ҳиндистон, Япония, Париж каби шаҳарларда хорижий тилларда нашр этилди. 1995 йилдан Ўзбекистон Республикаси Миллий мусиқа кенгаши раис ўринбосари, 2000-2006 йилларда эса раиси сифатида фаолият кўрсатди.

 

Т.Ғафурбеков қуйидаги илмий-назарий, тарихий асарларнинг муаллифидир:

1)    Монографиялар: «Фольклорные истоки узбекского профессионального музыкального творчества. (1984й.), Творческие ресурсы национальной мелодии и их преломление в узбекской музыке (1997й.), “Ўзбек бастакорлик санъати: тарих, тақдир, келажак” (Т., 1997), Сайланма (Т.,2009).

2)    120 дан ортиқ илмий-назарий мақолалар, шулар жумласидан: «Об обработках узбекского песенного фольклора» (В кн. «История и современность. Проблемы музыкальной культуры народов Узбекистана, Туркмении и Таджикистана. Москва, 1972), «К истории изучения музыкального творчества в Средней Азии» (В.кн.: Проблемы музыкальной науки Узбекистана. Ташкент, Фан, 1973), «Обработки народных песен» (В кн. История узбекской сов музыки. Том II (1945-1967). Т., 1973); «Мобильные ресурсы узбекской мелодии» (В кн. Взаимообогащение музыкальных культур народов Средней Азии и Казахстана. Т., 1977); «Камерно-инструментальная музыка» (В кн.: История узбекской музыки. Москва, 1979); «Народно-национальные истоки узбекской камерно-инструментальной музыки» (В кн. Музыкальная культура Москва, 1981), «Макомы в узбекской музыкальной драме и оперы» (В кн. Профессиональная музыка устной традиции народов Ближнего, Среднего Востока и современность - Т., 1981), «Жанрово-интегративные процессы в узбекской музыкальной драме» (В сб. Вопросы теории, истории и исполнительства в музыке сов Узбекистана. - Т.; 1984); «Пора интенсивного возмужания» (журн. «Сов Музыка». 1981. №7); «Узбекская музыка: свершения и перспективы» (совм. С.Р.Абдуллаевым, журн. «Сов музыка». 1982. №12); «Б.Асафьев о музыке устной традиции» (В кн. Б.В.Асафьев и сов.музыкальная культура. Москва, 1986); «Б.Асафьев об узбекском музыкальном наследии» (В.сб.Музыка народов Азии и Африки. Вып.5. Москва, 1987); «Узбекское инструментальное наследие» статья-рецензия на книгу Ф.М.Кароматова «Узбекская инструментальная музыка. Наследие», Музыкальная фольклористика. (Вып.3. Москва, 1986), «Творцы монодийных произведений в Средней Азии» (В кн.: Традиции музыкальных культур народов Ближнего, Среднего Востока и современность. Москва, 1987). «Авторская индивидуальность в узбекской традиционной музыке» Экспресс-информация. (Серия «Музыка». М. 1988); «Барбадово искусство: суть и судьба» (В кн. Борбад и художественные традиции народов Центральной и Передней Азии. Душанбе, 1990); «Искусствоведение Узбекистана: обретения, потерии, перспективы» (В кн. Бухара и мировая культура. Первый международный симпозиум. Бухара, 1993); Разделы «Музыкальная драма» (В кн. История музыки Средней Азии и Казахстана. Москва, 1995); Раздел «Музыка» (В кн.: Амир Темур в мировой истории. Издание ЮНЕСКО: Париж-Ташкент, 1996); «Музыкальное искусство эпохи Темура и Темуридов» (Журн. «Общественные науки в Узбекистане» 1996, № 5-6-7-8); «Искусствознание Узбекистана: от прошлого к грядущему» (В кн. Ўзбекистон санъатшунослиги муаммолари. Тошкент, 1997); Раздел «Музыка» (В кн. Хива-город тысячи куполов. Издание ЮНЕСКО: Париж-Ташкент, 1997); «Музыка эпохи Амир Темура и его образ в творчестве композиторов Европы (Материалы Международного симпозиума: Бонн - Ташкент, 1997). Ўзбек тилидаги нашрлар: «Ўзбек сов энциклопедияси». I-ХIV томлар (Тошкент, 1971-1980). «Ғарбий Европада мусиқа жанрларининг юзага келиши. В.А.Моцарт» (Сов Ўзбекистони санъати. 1978. №5); «Людвиг ван Бетховен» (шу журнал. 1978. №9), «Самарқанднома» // шу журнал. 1979. № 3; «Мерос ва композитор» // шу журнал. 1979. № 9; «Мутал Бурҳонов. Ижодий қиёфа». // шу журнал. 1979. №11; «Камер чолғу мусиқа». Ўзбек мусиқаси тарихи. Тошкент, 1980; «Ижоднинг олтин қирраси» //Сов. Ўзбекистони санъати. 1986. №11; «Шарқ хорижий Ғарб мусиқасида» // «Санъат» журнали. 1990. №3; «Навоий ва мусиқа». Муаммога бир назар. «Навоий» альманахи. № 1 (ўзбек, инглиз ва рус тилларида). 1991; «Дебоча» - уч аллома Ражабийлар. «Ражабийхонлик» тўплами. Тошкент. 1994; «Келинчакдек ораста юртни кўрдим» // «Гулистон». 1995. № 1; «Бобур мусиқа хусусида» // шу журнал. 1994. № 1; «Мустақил тафаккур тилаги». Санъатшунослик ниҳоллари. - Тошкент, 1995; «Қалб мавжидан чиққан садолар». М.Бурҳонов ва Т.Ғафурбековлар билан суҳбат. //Тафаккур. 1996. № 2; «Мусиқа»: Ўзбекистон Республикаси энциклопедияси. - Т., 1996; «Мусиқа»; Амир Темур жаҳон тарихида. ЮНЕСКО нашри: Париж-Тошкент, 1996; «Темурбек ва темурийлар даври мусиқа илми». Амир Темур даврида фан ва таълим Ренессанси. - Т., Ўз. Республикаси ФТДҚ нашри, 1996; «Самарали ҳамкорлик». Далварзинтепа Шаҳристони. Токио, 1996; «Мусиқа»; Хива — минг гумбазлар шаҳри. ЮНЕСКО нашри: Париж-Тошкент, 1997; «Муқаддима» ва «Ўзбекистон санъатшунослиги; борлиқлар, йўқотишлар, келажак». Ўзбекистон санъатшунослиги муаммолари. Тошкент, Фан, 1997; «XX аср ўзбек мусиқаси ва Юнус Ражабий». Мусиқа ижодиёти масалалари. 1-китоб. - Тошкент, 1997; Шу мақола //Жаҳон адабиёти. 1997. № 3; «Шарқ-Ғарб бадиий жараёни тадқиқ ва таҳлил янги минг йиллик арафасида». Марказий Осиё санъати; тарихий тараққиётнинг ўзига хослиги. Т., 1997; «Амир Темур даври мусиқа санъати. Соҳибқирон қиёфаси Европа опера ижодиётида». -Мустақил Ўзбекистон тарихи ва тараққиётида Амир Темур роли ва ўрни. - «Конрад Аденаур» ва «Амир Темур» жамғармалари нашри. Берлин-Тошкент, 1997., Музыкальная критика на переломе эпох.//Актуальные проблемы музыкальной науки и музыкального образования. Алматы, 2005, М.Таджиев симфонияларига қиёсий назар.//Санъатшунослик масалалари. 3-тўплам. Т., 2007.

3) Чет тиллардаги нашрлар: «Сайфи Жалил ва унинг 1 -«Самарқанднома» симфонияси. //Дни узбекской музыки в Народной Республике Болгарии. - София. 1978. - болгар тилида; «Впервые исполнено в Ташкенте». // Музыка. 1978 . № 5 - румин тилида; «Алишер Навоий ва мусиқа» «Навоий» альманахи 1991. 1.- инглиз тилида; «Алишер Навоий ва Эрон маданияти».// Вклад Иранских народов в развитие мировой цивилизации. - Душанбе, 1992. - рус. инглиз ва форс тилларида; «Самарали ҳамкорлик». Далварзинтепа Шахристони. - Токио, 1996. - япон тилида; «Мусиқа»; Темурийлар Ренессанси. - ЮНЕСКО нашри: Париж, 1996. - француз тилида; Шу мақола, - инглиз тилида; «Мусиқа»: Хива — минг гумбазлар шаҳри. ЮНЕСКО нашри: Париж, 1997. –француз ва  инглиз тилларида; «Мусиқа»: Бухоро — Шарқ дурдонаси. ЮНЕСКО нашри: Париж, 1997. - француз тилида. «Музыка эпохи Амира Темура», «Образ Амира Темура в творчестве композиторов Европы» //Роль и место Амира Темура в истории и развитии Независимого Узбекистана. - Берлин-Ташкент 1997 и 2000 - в двух томах: на немецком, узбекском, русском и английском языках.

 

Мусиқашунос олим Т.Ғафурбеков ўзбек мусиқа санъати ва мусиқа фанини ривожлантириш жараёнида қилган меҳнатлари учун 1988 йили «Ўзбекистонда хизмат кўрсатган санъат арбоби» фахрий унвони, 2014 йилда “Эл юрт ҳурмати” ордени ва медаллар билан тақдирланган.

                           БОЗОРБОЙ ЎРУНОВ

(1951-2019)

Бозорбой Ўрунов Хоразм вилоятининг Хонқа туманида 1951 йилнинг 18 апрелида таваллуд топди. 1966 йилда Ургенч давлат мусиқа билим юртининг ўзбек халқ чолғулари бўлимига ўқишга кирди. 1974 йили Низомий номидаги Тошкент давлат педагогика институтининг мусиқа факультетини муваффақиятли битирди. 1988-1993 йилларда Хоразм вилоят телерадиокомпанияси қошида «Мақом» ансамбли тузди ва унга раҳбарлик қилди.

Унинг «Гулла, яшна, юксал, Ўзбекистон», «Хоразм», «Дўстлик мадҳи», «Ўзбегим», «Лазги ҳақида қўшиқ», «Қутлуғ Наврўзи олам» каби қўшиқлари, яллалар, лапарлари ва бошқа асарлари ижрочиларнинг концерт дастурларидан кенг ўрин олган. «Мустақиллик қасидаси», «Ватан посбонлари», «Ўлкамизда шодиёна», «Хоразмда Хива бор», «Тўйга келинг» каби кўплаб асарлари «Ўзбекистон-Ватаним маним» танловида, Жалолиддин Мангубердининг 800 йиллиги, Хива шаҳрининг 2500 йиллик юбилей тантаналарида, оммавий тадбирларда жаранглади.

                                  РАУФ ҚОДИРОВ

 (1952)

Ўзбекистон Республикасида хизмат кўрсатган ёшлар мураббийси, таниқли олим, педагогика фанлари номзоди, Ўзбекистон давлат консерваторияси профессори, ISME (UNESCO) Мусиқа таълими бўйича халқаро жамиятининг аъзоси Рауф Қодиров ўзининг илмий ишлари билан Ўзбекистонда мусиқа педагогикаси ва психологиясининг ўзлаштирилишида ва кенг тарғиб этилишида катта муваффақиятларга эришди.

Рауф Ғафурович Қодиров 1952 йилнинг 27 сентябрида мусиқачилар оиласида туғилган. Унинг отаси таниқли композитор, Ўзбекистонда хизмат кўрсатган санъат арбоби Ғафур Қодиров, онаси В.А.Руколь скрипка ўқитувчиси. Р.Ғ.Қодиров В.А.Успенский номидаги мусиқа мактабини 1970 йилда, Тошкент давлат консерваториясини 1975 йилда доцент В.Ф.Кальтман синфида хор дирижёрлиги бўйича тугатган.

Р.Қодиров меҳнат фаолиятини 1975 йилдан Низомий номидаги Тошкент давлат педагогика институтининг мусиқа факультети кафедра ўқитувчиси сифатида бошлади. 1982-1985 йилларда Москвада Бутуниттифоқ Педагогика фанлари академияси Бадиий тарбия Илмий тадқиқот институтининг мусиқа бўлими аспирантурасида таҳсил олди ва 1986 йилда “Формирование навыков многоголосного пения в младших классах школ Узбекистана” мавзусида номзодлик диссертациясини муваффақиятли ёқлади. Р.Қодиров Низомий номидаги педагогика институтида: 1989-2000 йилларда мусиқий педагогика ва методика кафедраси мудири, 1992-1995 педагогика кафедраси докторанти, 1999 йилда амалий психология факультетини тугатган, 1999-2000 йилларда Мусиқа факультети декани ва бошқа лавозимларда фаолият юритган.

Ўзбекистон давлат консерваториясида Р.Қодиров 1991 йилдан мусиқий педагогика кафедраси доценти, 2000-2009 йилларда Илмий кенгаш котиби, 2002-2003 йилларда “Мусиқий педагогика” кафедраси мудири, 2003 йилдан профессори лавозимларда фаолият олиб бормоқда.

Р.Қодировнинг ўқув, илмий ва ижодий тадқиқоти асосан мусиқа педагогикаси ва психологияси масалаларига бағишланган бўлиб, бу соҳада 400 дан ортиқ  илмий-ижодий ишларни амалга оширди. Хусусан, “Бошланғич мактабда кўп овозли куйлаш” (1997), “Ўзбекистон болалар қўшиқлари антологияси” (2002), “Мусиқа психологияси” (ўзбек ва рус тилларида, 2005), “Музыкальная педагогика” (2009), “Мусиқа педагогикаси” (2011), “Оммабоп мусиқий глоссарий” (2014, 2016), “Композитор Ғафур Қодиров: ҳаёти ва ижоди /годы жизни и творчетство” (Монографияси, концерти ва DVD ёзуви, 2017), “Мусиқа педагогикаси” (2018) адабиётлари муаллифидир. Шунингдек, Болалар мусиқа Фестивалларинининг ташкилотчиси (2006, 2007, 2008), болалар учун “Айиқчам”, “Қуён”, “Меҳрибон ойижон”, “Акс садо”, “Эски шаҳар” каби бир қатор қўшиқлар муаллифидир. Р.Қодиров Фитратнинг “Ўзбек классик мусиқаси ва унинг тарихи”, Жомийнинг “Китоб”, Авлонийнинг “Мусиқа” китобларини илмий ва шеърий таржима қилган, халқ ижодиётига мансуб бўлган ва композиторларнинг болалар қўшиқларини шеърий таржима қилган ва жамоа бўлиб куйлаш учун қайта ишлаган.

Рауф Қодиров Ўзбекистон мусиқа санъати, педагогика ва психологияси, болалар мусиқа тарбияси масалаларини ривожлантириш йўлидаги салмоқли ҳиссалари учун 2017 йилда “Ўзбекистон Республикасида хизмат кўрсатган ёшлар мураббийси” фахрий унвони билан тақдирланди.

                               НАТАЛЬЯ ЯНОВ-ЯНОВСКАЯ

(1934)

Санъатшунослик фанлари доктори, профессор, мусиқашунос олима Янов-Яновская Наталья Соломоновна 1967 йилдан буён Ўзбекистон композиторлари ва бастакорлари уюшмаси аъзоси. Забардаст мусиқа тарихнависи, кўп қиррали олима, республикамиз мусиқа ҳаёти ва санъатшунослик фани ривожланиши жараёнида фаоллик кўрсатмоқда. Унинг «Музыка узбекского кино и киномузыка», «Узбекская симфоническая музыка», «Икрам Акбаров», «Муталь Бурханов. Время, жизнь, творчество» каби композиторларнинг ҳаёти ва ижодий фаолиятига бағишланган монографиялари, замонавий профессионал мусиқанинг турли мавзу, долзарб масала ва муаммоларига бағишланган 200 дан ортиқ мақола, тақриз, оммабоп, маъруза матни ва илмий чиқишлари билан республикамизнинг маданий ҳаётига ва ўзбек санъатшунослик фанига улкан ҳисса қўшиб келмоқда.

 

Янов-Яновская (Левина) Наталья Соломоновна 1934 йилнинг 31 майида Россиянинг Екатеринбург шаҳридаги ҳарбий муҳандис оиласида таваллуд топди. Наталья 1952 йили Самарқанддаги умумтаълим мактабини олтин медаль билан битириб, Тошкент давлат чет тиллар институтига ўқишга кирди. Тошкентга ўқишга келган йили консерваториянинг кечки курсида ҳам ўқиди. 1953 йили консерваториянинг мусиқашунослик факультетига ўқишга кирди. 1958 йили профессор С.М.Векслер раҳбарлигида диплом ишини ҳимоя қилиб муваффақиятли битирди.

Н.Янов-Яновская ўқишни битиргандан сўнг меҳнат фаолиятини Ўзбекистон радиосининг чет эл бўлимида катта муҳаррирликдан бошлади. 1960-1992 йилларда Ҳамза номидаги санъатшунослик илмий тадқиқот институтида илмий ходим бўлиб ишлади. 1966-1987 йилларда у консерваторияда мусиқа назарияси фанидан дарс берди. Н.Янов-Яновская 1966 йили «Музыка узбекского кино» мавзуида ёзган диссертацияни ҳимоя қилиб санъатшунослик фанлари номзоди ва 1984 йили «Узбекская симфоническая музыка» мавзусида ёзган диссертациясини ҳимоя қилиб, санъатшунослик фанлари доктори илмий даражасига эга бўлди. 1990-2010 йилларда консерваторияда доцент, профессор, 2009-2014 йилларда консерватория қошидаги Илмий тадқиқот марказида етакчи илмий ходим лавозимларида фаолият кўрсатди.

Н.Янов-Яновская илмий асарлари: “Музыка узбекского кино и киномузыка” (Фан. Т.1969г.), «Узбекская симфоническая музыка» (Ғ.Ғулом номидаги нашр. Т.1979й.), «Икрам Акбаров» (Г.Гулям, Т. 1990 й.), «Муталь Бурханов. Время, жизнь, творчество» (1999 й.), Узбекская музыка и ХХ век. (Т., 2007), Памяти наших учителей (Я.Янов-Яновский ва Д.Янов-Яновский билан ҳамкорликда. Т.,2010), “Композитор Икрам Акбаров” (Т., 2011) монографиялари, мусиқа санъатига боғлиқ қуйидаги тўпламларнинг айрим бобларини ёзди. Жумладан, «История узбекской сов.музыки» уч томли китобдаги биринчи, иккинчи ва учинчи бобларни; «История музыки Средней Азии и Казахстана»да учинчи, тўртинчи ва бешинчи боблари; «История музыки народов ССР»да олтинчи боб; «История и современность»да «Инструментальный концерт в Узбекистане» мақоласи (Москва, 1972 й.), «Сов.музыкальная культура» китобида «Макомы и узбекская симфоническая музыка», Москва. 1980 й., «Сов музыка на современном этапе» тўпламида «О национальном стиле современной узбекской симфонической музыки» (Москва. 1981г.), «Музыкальная культура братских народов» тўпламида «Пути освоения жанра» (Киев, 1982й.), «Музыка народов Азии и Африки» тўпламида «У истоков многоголосия в узбекской музыке» (4 китоб, 1984 й.) мақолалари, «Борбад и художественные традиции народов Центральной и Передней Азии» тўпламида «К вопросу о «Восточном симфонизме» мақола-маърузаси (Душанбе. 1990й.), «Культура Среднего Востока» тўпламида «Национальные традиции и современное симфоническое творчество» (Ташкент. 1992 г.), «Общественные науки» журналининг 5- ва 6-сонларида 1992 йилда «О современном этапе развития узбекской музыкальной культуры» мақолалари, «Традиции и новаторство в искусстве Центральной Азии» тўпламида «О путях формирования узбекской композиторской школы (на примере стилей) И.Акбарова и М.Бурханова» (Т.,1995й.), “Мустақиллик ва маънавий тараққиёт китобида” “Узбекское музыковедение последнего десятилетия ХХ века: обретения, проблемы” (Т., 2001), “Мусиқа ижодиёти масалалари” тўпламида “Мусиқашунослик муаммоларига бир назар” (Ф.Кароматли билан ҳамкорликда, Т., 2002), “Европейский театр в исламском мире: постсоветские трасформации в театральном искусстве Центральной Азии” китобида “Узбекская опера как явление интертекста” (Т., 2003), “Традиционное и современное искусство Казахстана и Средней Азии” тўпламида “Теория интертекста в ее проекции на восточную музыку” (Олмаота, 2004), “Ўзбекистон санъатида маданий толерантлик ва анъаналарнинг ўзига хослиги” тўпламида “Проблемы музыкального времени и пространства в контексте диалога культур” (Т.,2005), “Санъатшунослик масалалари”нинг II – тўпламида “В поисках научной истины” (Т.,2005), “Процессы реформирования музыкального образования” китобида “К вопросу об историзме мышления” (Т.,2009), “Голос человеческий” китобида “Современность, освященная с историей” (М.,2011) «Музыкальное образование XXI века: проблемы и решения» Халқаро илмий-амалий конференция мақолалар тўпламида “К проблеме создания “Истории узбекской музыки ХХ века” (Т.,2014) мақолалари, Англияда 2000 йилда чоп этилган «Мусиқа энциклопедияси» китобига Марказий Осиё композиторларининг ижодий фаолиятини ёритган 24 та мақола. Москвада чоп этилган журналга Н.Янов-Яновская 40 дан ортиқ илмий мақола ёзди. Мусиқашунос олиманинг кўпгина мақолалари интернет сайтларида мунтазам чиқмоқда.

Н.Янов-Яновская тинмай ижодий меҳнат қилиб, республикамиз мусиқий илмий даражасини кўтаришда жонбозлик кўрсатди. У ўзбек замонавий профессионал мусиқа санъати ва санъатшунослик фанининг ривожланиш жараёнига самарали катта ҳисса қўшди. У 1972 йили мусиқашунослар кўрик танловида 1 даражали дипломга сазовор бўлди.

Янов-Яновская Наталья Соломоновна консерваторияда кўп йиллик педагоглик фаолияти давомида кўплаб ёш мусиқашунос мутахассисларни тарбиялади. Унинг раҳбарлигида ўнлаб талабалар диплом ишларини муваффақиятли ҳимоя қилиб республикамизда ва чет элларда фаолият кўрсатиб келмоқдалар. 2000 йилларга қадар устоз раҳбарлигида санъатшунослик фанлари номзоди илмий даражасига қуйидаги мусиқашунослар муваффақ бўлдилар: С.Воҳидов, З.Мирҳайдарова, С.Мирхўжаева, Н.Ҳасанова, О.Беков (Ўзбекистон), Е.Осипова (Туркманистон), И.Н.Захарченко (Қозоғистон), Л.Назарова (Тожикистон), А.Н.Жешинский (Қирғизистон).

Н.Янов-Яновская шу билан бирга диссертация ёқловчиларга оппонентлик қилди. У Санъатшунослик илмий тадқиқот институти таркибидаги ихтисослашган кенгашнинг 1981 йилдан буён аъзоси. 1992-1998 йилларда Ўзбекистон Олий Аттестация комиссияси кенгаши аъзоси, Ўзбекистон Бастакорлар уюшмасининг мусиқашунослик ва танқидчилик комиссияси раиси, 2003-2005 йилларда Олмаотадаги М.Ауэзов номидаги тил ва адабиёт институти қошидаги диссертацияларни ҳимоя қилиш бўйича махсус кенгаш аъзоси сифатида фаолият кўрсатди.

Н.Янов-Яновская 2001 йилда «Дўстлик» ордени билан тақдирланган. 1991-1992 йилларда Халқаро таржимаи ҳоллар марказининг (Кэмбридж, Англия) ва 1993 йили Америка таржимаи ҳоллар институтининг (Шимолий Каролина) «Йил аёли» номинацияларига сазовор бўлган.